每個女人都有自己開竅的年期，講緊嘅係你開始研究邊隻化妝品、護膚品好用、開始意識自己需要扮靚的時期，通常有第一個心儀對象，係會驅使女仔踏出扮靚第一步。但當一個女人逐漸成長，令佢成購物狂魔，相信就係出社會工作，接觸的人、事，令佢想「變身」。
而我扮靚開竅期係大學三年級，此前都係用屈臣氏就買得到的化妝品，例如MaxFactor粉底。不少大學都安排暑期實習，我學校都唔例外，某年暑假，經過幾重面試後，我去咗亞視實習。一個唔多識化妝的女仔入電視台做記者，首要顧好自己新聞根基，因為怕出去採訪問時問錯問題、或認錯人就好瘀皮。
另外，我地亦要照顧好自己個樣，因為電視台記者個妝係需要自己化嘅，上鏡醜唔醜都係睇你識唔識化妝，當然，做記者唔使要靚，有內涵先最緊要。
偏偏我遇上一班最貪靚嘅實習伙伴，大家食飯或得閒就會入廁所補妝，果陣就係我一次過接觸最多不同化妝品牌子的時候，每次聽大家討論IPSA粉餅好遮暇、MAC嘅化妝掃又平又好用之類的言論，我就好似大鄉里出城咁，盡量聽、盡量學。結果，實習三個月完結後，我已經買咗好多不同品牌的化妝品，就此，我的「購物成魔」之路就開始了。
．附上驚嚇實習樣一張
Search